साहित्य अकादमी द्वारा जाहि पोथीक अनुवाद मैथिली सँ अन्य भाषा मे भेल अछि से निम्न प्रकारें देखल जा सकैछ :-

(१) पत्रहीन नग्न गाछ : एहि पोथीक अनुवाद हिन्दी भाषा मे आचार्य सोमदेव एवं श्री शोभाकान्त द्वारा भेल अछि ।
(२) दू पत्र : ई उपन्यास व्यासजी द्वारा लिखित ओ साहित्य अकादमी द्वारा पुरस्कृत थीक । एकर अनुवाद हिन्दी मे उपन्यासकार स्वयं कएने छथि ।

(३) नैका बनिजारा : ई मणिपद्मक उपन्यास थीक, जाहि पर हिनका साहित्य अकादमी पुरस्कृत कएलकन्हि । एकर हिन्दी अनुवाद साहित्य अकादमी सँ पुरस्कृत विद्वान डॉ० गंगेश गुंजन द्वारा भेल अछि ।

(४) मंत्रपुत्र : ‘मंत्रपुत्र’ प्रो० मायानन्द मिश्रक औपन्यासिक कृति थीक जाहि पर ई साहित्य अकादमीक पुरस्कार सँ सम्मानित भए चुकल छथि आ ‘एकर अनुवाद ई हिन्दी मे कएने छथि, जे राजकमल प्रकाशन द्वारा प्रकाशित भए चुकल अछि ।

(५) तकैत अछि चिड़ै : ई कविता विधा मे जीवकान्त द्वारा रचित पोथी थीक, जकर अनुवाद हिन्दी मे केदार कानन द्वारा भेल अछि आ साहित्य अकादमिये सँ प्रकाशित भेल अछि । ध्यातव्य, जे इहो साहित्य अकादमी द्वारा पुरस्कृत पोथी थीक ।
(६) ई बतहा संसार : ई बतहा संसार’ स्व० सुधांशु शेखर चौधरीक उपन्यास-विधाक कृति थीक । एहि पर ई साहित्य अकादमी पुरस्कार सँ सम्मानित भए चुकल छथि जकर अनुवाद डॉ० प्रेमशंकर सिंह हिन्दी मे कएने छथि आ साहित्य अकादमिये एकरा प्रकाशित सेहो कएने अछि । एतदतिरिक्‍त सूचना अछि जे पं० चन्द्रनाथ मिश्र ‘अमर’क पुरस्कृत कृति ‘मैथिली पत्रकारिताक इतिहास’ एवं डॉ० रामदेव झाक साहित्य अकादमी सँ पुरस्कृत नाट्‍य-कृति ‘पसिझैत पाथर’ सेहो अनूदित भए रहल अछि ।

इहो संभव थीक जे एहि सूचीक अतिरिक्‍तो कोनो पुरस्कृत पोथी हो जकर अनुवाद होइत हो, परंच से हमरा जानकारी मे नहि अछि, तेँ तकर उल्लेख करब संभवे नहि ।
सम्पर्क : बैंक कॉलोनी, धर्मपुर
पो० : लक्ष्मीनगर, जिला : दरभंगा (बिहार)